Primatech
Versjon 0.2, 2022-02-18
Primatech er eit Huitaka-basert teknologiselskap som har spesialisert seg på utvikling og bruk av kunstig intelligens. Firmaet er ein av dei største leverandørane av KI-system for forbrukarar i Zuhe-systemet, og produkta deira er svært populære i Det planetære demokratiet Huitaka. I motsetnad til sin kanskje største intiske motpart, Fadiki, har Primatech spesialisert seg innanfor forbrukarmarknaden og unngått å konkurrere med allereie etablerte leverandørar av industrielle KI-system.
Primatech har gjort stor suksess med sine personlege assistentar. Dei leverer komplette løysingar som integrerer heimeautomatisering med ein personleg KI-assistent, men sjølvstendige KI-assistentar inngår også i porteføljen for dei som måtte ønske det. KI-assistentane frå Primatech er kompatible med alle dei store huitakiske leverandørane av kybernetiske implantat, og nokre av dei er også kompatible med personlege styringseiningar frå Mejlotoruta. Andre produkt inkluderer profesjonelle KI-system for situasjonar som krev ein viss grad av interaksjon, som kunderelasjonar og liknande grensesnitt.
Antroidar
Primatech har nyte godt av Konføderasjonen si relativt lause regulering av kunstig intelligens, og gjennom dotterselskapet Primavera har dei også utvikla ei rekke ulike antroidar. Som i Inti-systemet er desse først og fremst eit luksusprodukt, men i motsetnad til dei intiske antroidane er det ingen juridiske grenser for kor realistiske desse antroidane kan vere, så lenge dei ikkje har til hensikt å etterlikne ein ekte person.
Evexine
Sjølv om Primatech er Huitaka-basert har firmaet etablert ein filial på den intiske «feriekolonien» Evexine. Primatech Evexine er den einaste representasjonen selskapet har i Inti-systemet og fungerer både som utstillingsvindauge, leverandør og utsalsstad for Primatech sine produkt for UIA-borgarar. Særleg populære er Primavera-antroidane, sjølv om dei er tilpassa intiske KI-reguleringar og krav om tydeleg identifisering for antroidar.