Den ekstrasolare ekspedisjonen
Versjon 0.1, 2020-08-18
Den ekstrasolare ekspedisjonen (monda: La ekstersola esplor) er eit Kamak-basert romgruveselskap. Ekspedisjonen er ikkje offisielt eigd eller kontrollert av Den sameinde Inti-administrasjonen (UIA), men blir rekna for å operere under Administrasjonens godkjenning og mogleg også styring.
Ekspedisjonen er den einaste UIA-aktøren som i dag opererer i Utu-systemet og fungerer som den uoffisielle representanten for Administrasjonen i systemet.
Gruvestasjonar og operasjonar
Den ekstrasolare ekspedisjonen har hovudkvarter på Kamak, men brukar Marduk som base for operasjonane sine i Utu-systemet. Marduk er i tilleg den største gruvelokasjonen, men Ekspedisjonen driv også fleire mindre gruver i andre delar av systemet der risikoen for konflikt med dei zuhiske gruvekompania er relativt låg.
Politikk og organisasjon
Den ekstrasolare ekspedisjonen er leia av ein generalsekretær i samråd med ein styringskomité. Komitéen utnemner også ein førstesekretær som leiar alle operasjonane i Utu-systemet, tilsvarande generalguvernøren i Koubutsu kombinéiert og høgkommisæren for Handelskompaniet for nye stjerner. Dei ulike direktorata og underavdelingane i føretaket er leia av avdelingssekretærar, mens einskilde installasjonar som romstasjonar typisk har eigne direktørar.
Trass mangelen på offisielle band mellom Ekspedisjonen og UIA, er det velkjent at fleire høgt plasserte ekspedisjonsfunksjonærar frekventerer dei same miljøa som UIA-politikarane. Det er ei allmenn forståing at Administrasjonen er involvert eller i det aller minste informert om aktiviteten i føretaket.
Tryggleik
Regulære forsvars- og tryggleikstiltak blir handterte av Ekspedisjonens Direktorat for tryggleik, mens væpna patruljar og og eskorteskip ligg under det separate Direktoratet for tilrettelegging. Tryggingsdirektoratet driftar ein fullverdig politistyrke og opprettheld interne føretakslover og reguleringar. Direktoratet for tilrettelegging rekrutterer og handsamar ein eigen væpna tryggingsstyrke for anti-piratverksemd. Tilretteleggingsflåta er ansvarleg for alle patrulje- og eskorteoppdrag for Ekspedisjonen utanfor ansvarsområdet til Den intiske romflåta.
Forhold til Utu-innbyggarane
Ekspedisjonen, som dei andre gruvekompania, tilsett lokale arbeidarar frå Utu-systemet som billeg arbeidskraft. I motsetnad til Koubutsu og Handelskompaniet forbyr ikkje Ekspedisjonen eksplisitt lokale frå å avansere til høgare stillingar. På grunn av ansiennitetsreglar og avgrensa tilgang på utdanning er andelen utuanarar likevel marginal i dei høgare sekretariata.